Isang Tula

 

By: Allyson Jane Cruz

 

Uumpisahan ko sa bilang ng sampo.

Mahal ayoko na. Ayoko nang muling lumuha.

At muling mabalot ng luha ang aking mga mata.

Mga luhang paulit-ulit na lumandas

At paulit ulit ka ring nagpupunas.

 

 

Pang siyam.

Ma, Pa ayoko na.

Ayoko nang matulog nang nag iisa.

Na katabi at kayakap ay wala.

Na tuwing iihip ang hangin Ay aking maaalala na ako ay walang kasama.

 

 

 

Pang walo.

Mahal ayoko na.

Ayoko na sa mga pangako.

Mga pangako na laging napapako.

Pati rin sa’yong mga kasinungalingan.

At mga paulit ulit mong dahilan.

 

 

Pang pito.

Mahal ayoko na.

Ayoko ng masaktan

Ang masaktan, lumuha at mapaglaruan

Nang ating pagmamahalan

Na dapat dulot sakin ay kasiyahan

 

 

Pang anim.

Ma, Pa ayoko na.

Ayoko ng gumising ng mag isa.

Sa higaang wala namang laman

Na susundan ng pagkain ng nag iisa

At pagpasok sa eskwela ng walang yakap at paalam mula sa ina at ama

 

 

Pang lima.

Mahal ayoko na.

Ayoko na sa ating mga ala ala.

Na sa tuwing aking sinasariwa

Ay puno ng ngiti, kulay at ligaya

Ngunit ngayon ay napalitan ng galit, sakit at pait.

 

 

Pang apat.

Ma, Pa ayoko na.

Ayoko na sa pera.

Na bigay lamang ay pandaliang ligaya.

Perang hindi naman ako mabigyan ng pamilya

Isang magkasama at masayang pamilya.

 

 

Pangatlo.

Mahal ayoko na.

Ayoko ng umasa.

Ang umasa sa ating dalawa.

At panghawakan ang pangako mong kumupas na

Dahil mahal sa wakas, natutunan ko nang kalimutan ka.

 

 

Pangalawa.

Ma, Pa ayoko ng lumaban.

Ang paulit ulit na laban

Para sa inyong kaunting atensyon

Dahil ma, pa ako’y pagod na

Gusto ko na lamang maghintay

Maghintay para sa aking magulang.

 

 

Pang una.

Aking sarili ayoko na.

Ayoko na munang magmahal.

Ang pag-ibig na magbibigay kulay sa aking buhay

Na akala ko’y pupunan ang bawat patlang

Ngunit sa kalaunan ay ito rin ay mamatay

At magiging ala ala na lamang.

 

 

Hindi ito numero, ngunit ito na ang panghuli.

Mahal, Ma at Pa Gusto kong bumalik

Sa mga panahong ang mata ko’y nagniningning

Hindi dahil sa luha

Kundi dahil sa ligaya

 

 

Pati rin ang aking mga ngiti

Na walang halong kahit pagkukunwari

Na dati’y totoo at galing mula sa aking puso.

 

 

Mahal, Ma at Pa

Ako naman ay inyong samahan

Dito sa kalungkulatan at kadiliman

At ako’y inyong hawakan, yakapin at hagkan

At sabihang di niyo na ako iiwan.